Қува туманида фаолият юритаётган “Vertex” тикувчилик корхонасида “Аёллар дафтари”га киритилган ишсиз хотин-қизларнинг бандлигини таъминлаш мақсадида меҳнат ярмаркаси ташкил этилди. Тадбирда туман ҳокимининг ўринбосари Матлубахон Холматова иштирок этиб, корхонада аёллар учун яратилган шароитлар, уларнинг ўз меҳнат маҳорати ва қобилиятини тўла намоён қилиши учун имкониятлар мавжудлиги ҳақида тўлиқ маълумот берди. Шунингдек, ҳар бир аёлнинг ўз севган касби ва иш жойига эга бўлиши зарурлиги, хотин-қизлар жамият тараққиётида беқиёс ўрин тутишини таъкидлади. Корхона раҳбари Шахноза Арзиқулова меҳнат ярмаркаси қатнашчиларига иш шароитлари, ишчи-ходимлар учун яратилган қулайликлар, транспорт хизмати ҳамда бошқа имтиёзлар ҳақида батафсил тўхталиб ўтди. Унинг сўзларига кўра, ҳозирда корхонада 100 нафарга яқин хотин-қизлар меҳнат қилмоқда. Шу билан бирга, яна 100 та янги иш ўрни яратилгани ва ишсиз хотин-қизларни банд қилишга корхона тўлиқ тайёр экани қайд этилди. Бўлиб ўтган ярмаркада 50 дан ортиқ ишсиз ва профилактик ҳисобда турган хотин-қизлар иштирок этиб, иш жойлари билан яқиндан танишдилар ва шу куниёқ рўйхатдан ўтишди.