Қува туманида “Ёшлар куни” муносабати билан ёшларнинг муаммо ва таклифларини ўрганиш, уларга яратилаётган имкониятлар билан яқиндан танишиш мақсадида очиқ мулоқотлар ва жойларда ўрганиш ишлари изчил давом этмоқда. Туман ҳокими Халимжон Умаров иштирокида ўтказилаётган бундай учрашувлар ёшлар билан мулоқотни янги босқичга олиб чиқмоқда. Айниқса, туманда янги ташкил этилаётган 2-сонли техникумда амалга оширилаётган ишлар билан танишув алоҳида аҳамият касб этди. Ташриф давомида қурилиш ва жиҳозлаш ишларининг бориши кўздан кечирилиб, уларни жадаллаштириш ва қисқа муддатларда сифатли якунлаш бўйича масъулларга аниқ топшириқ ва кўрсатмалар берилди. Бу эса келгусида ёшлар учун замонавий таълим олиш имкониятларини янада кенгайтиришга хизмат қилади. Шунингдек, мазкур ҳудудда фаолият юритаётган моно марказда таҳсил олаётган ёшлар билан очиқ мулоқот ўтказилди. Самимий суҳбат жараёнида ёшлар ўзларини қизиқтирган касблар, келажак режалари ҳамда таклифлари билан ўртоқлашдилар. Уларга зарур йўналишлар бўйича маслаҳат ва тавсиялар берилди. Бундай очиқ ва самимий мулоқотлар ёшларнинг муаммоларини ўз вақтида ҳал этиш, уларнинг ташаббусларини қўллаб-қувватлаш ҳамда эртанги кунга бўлган ишончини мустаҳкамлашда муҳим аҳамият касб этмоқда. Зеро, ёшлар билан мулоқот — бу шунчаки учрашув эмас, балки келажак пойдеворини мустаҳкамлашдир.