Қува туманида “Ёшлар куни” муносабати билан ички ишлар тизимида фаолият олиб бораётган ёш ходимлар билан очиқ ва самимий учрашув ташкил этилди. Унда туман ҳокими Халимжон Умаров ҳамда туман Ички ишлар бўлими бошлиғи Фаррухбек Усаров иштирок этди. Учрашув давомида тизимда хизмат қилаётган ёш ходимларнинг фикр-мулоҳазалари, таклиф ва ташаббуслари тингланди. Самимий мулоқот руҳида ўтган суҳбатда уларнинг хизмат фаолиятидаги ютуқлари, дуч келаётган масалалари ва келгусидаги мақсадлари атрофлича муҳокама қилинди. Туман раҳбари томонидан ёшларни қўллаб-қувватлаш, уларнинг касбий маҳоратини ошириш ва хизмат фаолиятида муносиб шароитлар яратиш масалаларига алоҳида эътибор қаратилди. Шу билан бирга, ёш ходимларга масъулиятли ва шарафли касб эгаси сифатида юксак садоқат, интизом ва фидойилик билан хизмат қилиш зарурлиги таъкидланди. Учрашув давомида илгари сурилган таклифлар асосида тизимдаги иш самарадорлигини янада оширишга қаратилган вазифалар белгилаб олинди. Бундай мулоқотлар нафақат ёш ходимларни руҳлантиради, балки уларнинг давлат ва жамият олдидаги масъулиятини янада чуқур ҳис этишига хизмат қилади. Зеро, ёшлар — бугунги ислоҳотларнинг фаол иштирокчиси, эртанги куннинг ишончли эгаларидир.