Бугун, Қува туманида халқ депутатлари туман Кенгашининг навбатдаги ўн иккинчи сессияси бўлиб ўтди. Сессияда туман ҳокими, ташкилот ва муассаса раҳбарлари, депутатлар ҳамда оммавий ахборот воситалари вакиллари иштирок этди. Сессия кун тартибида бир қатор муҳим масалалар муҳокама қилинди. Жумладан, Ўзбекистон Республикаси Президентининг 2025 йил 3 январдаги ПҚ-1-сон Қарори ижроси юзасидан туманда амалга оширилган ишлар юзасидан масъуллар ҳисобот берди. Шунингдек, 2025 йилнинг иккинчи чорагида туманда жиноятчиликни камайтириш, коррупция ҳолатларининг олдини олиш, маҳаллий бюджет даромадлари бажарилиши ҳолати, қўшимча резервларни аниқлаш, солиқ ва мажбурий тўловлар бўйича ҳисобланган ва амалда тўланган маблағлар, солиқ қарздорлиги ҳолати каби масалалар атрофлича муҳокама этилди. Сессияда давлат бюджет маблағларидан оқилона фойдаланиш, бюджет интизомини мустаҳкамлаш, тизимда коррупция ҳолатларига йўл қўймаслик юзасидан амалга оширилаётган ишлар юзасидан масъул раҳбарларнинг ахборотлари эшитилди. Бундан ташқари, “Тиббиётда 90 кунлик ўзгаришлар” дастури доирасида амалга оширилаётган ишлар, аҳоли саломатлигини таъминлаш, касалликлар профилактикаси бўйича тизимли чоралар ва амалга оширилаётган ташаббуслар юзасидан ҳам масъуллар сессия иштирокчиларига ахборот тақдим этдилар. Музокаралар якунида кўтарилган масалалар юзасидан тегишли қарорлар қабул қилинди.