Жисмоний фаоллик ва соғлом турмуш тарзини кенг тарғиб қилиш, ёши улғайган фуқароларни спортга жалб этиш мақсадида Қува туманида 60 ёш ва ундан катта бўлган нуронийлар ўртасида “Ғайратли кексалар” шиори остида мини футбол тури бўйича вилоят босқичи бўлиб ўтди. Мазкур спорт тадбири туман аҳолиси, айниқса, ёши улуғ инсонлар учун кўтаринки кайфият улашди. Мусобақада Фарғона вилояти “Нуроний” жамғармаси раиси Зокиржон Раҳмонов, Қува тумани ҳокими Халимжон Умаров ҳамда туман “Нуроний” жамғармаси раиси Зоҳиджон Ашуровлар иштирок этишди. Тадбир давомида иштирокчилар ўртасида дўстона муҳит ҳукм сурди, кексалар ўзаро спорт маҳоратларини намоён этиб, ўзларидаги ғайрат ва фаолликни намойиш қилишди. Ғолиб ва фаол иштирокчилар ташкилотчилар томонидан эсдалик совғалари билан тақдирландилар. Бундай мусобақалар нафақат жисмоний соғломликни, балки руҳий кўтаринкиликни таъминлаш, ёшлар ва нуронийлар ўртасида тажриба алмашишга хизмат қилади.