Қува туманидаги табиат қўйнида жойлашган Каркидон сув омбори ҳудудида экотуризмни ривожлантириш бўйича амалга оширилаётган ишлар изчил давом этмоқда. Мазкур лойиҳа доирасида ҳудудда қурилиш, ободонлаштириш ва кўкаламзорлаштириш ишлари кенг кўламда йўлга қўйилган. Экотуризм салоҳиятини тўлақонли рўёбга чиқариш ҳамда бу ерга ташриф буюрувчилар сонини ошириш мақсадида ҳудудда 57 та замонавий дам олиш маскани ва меҳмон уйлари барпо этилмоқда. Ҳар бир иншоот замон талабларига мос равишда, табиат билан уйғун ҳолда қурилаётгани, келгусида мазкур ҳудудни Фарғона водийсининг энг севимли сайёҳлик нуқталари қаторига киритиш имконини беради. Бугунги кунда лойиҳанинг дастлабки босқичлари якунланиб, илк замонавий, барча қулайликларга эга бўлган дам олиш маскани фойдаланишга топширилди. Янги иншоотда меҳмонлар учун барча шарт-шароитлар – дам олиш хонадонлари, овқатланиш масканлари, болалар майдончалари ҳамда табиий гўзалликдан баҳра олиш учун қулай ҳудудлар яратилган. Таъкидлаш жоизки, мазкур ташаббус нафақат туманнинг туристик жозибадорлигини ошириш, балки янги иш ўринлари яратиш ва аҳоли бандлигини таъминлашга ҳам хизмат қилмоқда.