Ўзбекистон Республикаси Қуролли Кучлари ташкил этилганлигининг 34 йиллиги ҳамда 14 январь — Ватан ҳимоячилари куни муносабати билан Қува тумани марказида кўтаринки руҳда “Ҳарбий ватанпарварлик фестивали” ташкил этилди. Мазкур тадбир Ватанга муҳаббат, миллий ғурур ва ҳарбийлик шарафини улуғлашга қаратилган маънавий-маърифий байрам сифатида кенг жамоатчиликда катта таассурот қолдирди. Фестиваль давомида ҳарбий хизматчиларнинг жанговор чиқишлари, сафда пиёда юришлари ҳамда замонавий ҳарбий қурол-аслаҳалар кўргазмаси намойиш этилди. Айнан шу лаҳзаларда йиғилганлар Қуролли Кучларимизнинг қудрати, интизоми ва жанговор шайлигини яққол ҳис этдилар. Ҳар бир ҳаракат, ҳар бир саф қадами Ватанга садоқат, халққа хизмат қилишдек муқаддас тушунчаларнинг ёрқин ифодаси бўлди. Тадбирда ҳарбий оркестрлар ижросида янграган ватанпарварлик қўшиқлари фестивалга алоҳида руҳ бахш этди. Марш садолари қалбларда фахр ва ифтихор туйғуларини уйғотиб, ёш авлодни Ватанни севиш, уни ҳимоя қилишга доим тайёр бўлиш руҳида тарбиялашга хизмат қилди. Айниқса, ёшлар ва болажонлар ҳарбийларнинг чиқишларини катта қизиқиш билан томоша қилиб, ўзларида ҳам ҳарбийликка, Ватан хизматчиси бўлишга бўлган орзу ва интилишни ҳис этдилар. Ҳарбий қуроллар ва техника кўргазмаси эса фестивалнинг энг диққатга сазовор қисмларидан бири бўлди. У ерда мамлакатимиз мудофаа салоҳиятини таъминлаб турган замонавий қурол-аслаҳалар намойиш этилиб, ҳарбий мутахассислар томонидан уларнинг вазифалари ва аҳамияти ҳақида батафсил маълумотлар берилди. Бу эса фуқароларнинг, айниқса ёшларнинг ҳарбий соҳадаги билим ва тасаввурларини янада бойитди. Бундай тадбирлар Ватан ҳимоячиларининг жамиятдаги ўрни ва нуфузини янада юксалтириш, халқ билан армия ўртасидаги мустаҳкам алоқани кучайтиришда муҳим аҳамият касб этади. Энг муҳими, “Ҳарбий ватанпарварлик фестивали” орқали юртимиз тинчлиги, осойишталиги ва мустақиллигини қўриқлаётган жасур ҳарбийларимизга бўлган ҳурмат ва эътироф янада ортди.