Қува туманида Давлатимиз раҳбари томонидан ҳафтанинг ҳар пайшанба куни “Ёшлар куни” сифатида белгилангани муносабати билан ёш авлод учун муносиб шарт-шароитлар яратишга қаратилган ишлар изчил давом этмоқда. Шу муносабат билан Қува тумани ҳокими Халимжон Умаров Саноатчилар маҳалласида жойлашган 26-давлат мактабгача таълим ташкилотида бўлиб, ушбу муассасада олиб борилаётган қурилиш ишлари билан танишди. Маълумки, мактабгача таълим тизимини ривожлантириш, болажонларни сифатли таълим ва тарбия билан қамраб олиш, улар учун замонавий ва қулай муҳит яратиш бугунги кундаги устувор вазифалардан бири ҳисобланади. Айни пайтда мазкур ҳудудда болажонлар учун барча қулайликларга эга бўлган, замонавий талаблар асосида янги бино барпо этилмоқда. Туман ҳокими қурилиш ишларининг бориши, бинонинг лойиҳаси ва яратилаётган шарт-шароитлар билан танишиб, масъулларга ишларни сифатли ва белгиланган муддатларда якунлаш юзасидан тегишли кўрсатмалар берди. Бундай ишлар ёш авлоднинг баркамол бўлиб камол топиши, уларнинг сифатли таълим-тарбия олиши ҳамда келажакда юрт равнақига муносиб ҳисса қўшадиган етук инсонлар бўлиб вояга етишида муҳим аҳамият касб этади.